У Слуцкім раённым цэнтры народнай творчасці адбылося цёплае, вясновае і вельмі душэўнае мерапрыемства – майстар‑клас па выпяканні традыцыйных птушак‑вяснянак з дражджавога цеста. Удзельнікамі сталі вучні 5–6 класаў Маякскай СШ, а праводзілі занятак Святлана Іванаўна Козлоўская і Наталля Сяргееўна Кухта. Атмасфера панавала такая, што нават дарослыя адчувалі сябе дзецьмі, а дзеці – сапраўднымі гаспадарамі беларускай кухні.
Зала была ўпрыгожана нацыянальнымі элементамі, і ўжо пры ўваходзе гасцей сустракала гаспадыня ў традыцыйным строі. Яна запрашала ўсіх у беларускую кухню, дзе чакала майстар беларускай кулінарыі Святлана Іванаўна. Яна павітала дзяцей, расказала пра свята Саракі і пра тое, як нашы продкі 22 сакавіка заклікалі вясну, выпякаючы птушачак‑жаўранкаў. Гэтыя маленькія булкі былі не проста пачастункам – яны сімвалізавалі прыход цяпла і абуджэнне прыроды.
Дзеці апранулі фартушкі і каўпачкі і з вялікай цікавасцю назіралі, як нараджаецца цеста: як разводзяцца дрожджы, як замешваецца апара, як дадаецца мука, каб цеста стала мяккім і эластычным. Святлана Іванаўна тлумачыла кожны крок, а школьнікі ўважліва паўтаралі. Калі цеста падышло, пачалося самае цікавае – стварэнне птушачак. Кожны рабіў сваю: раскатваў «каўбаску», завязваў вузел, фарміраваў хвосцік відэльцам, рабіў носік і ўстаўляў «вочкі» з гарошын перцу. У кожнага атрымалася свая, непаўторная птушка.
Пакуль птушкі адпачывалі перад выпяканнем, дзеці слухалі аповед пра пералётных птушак, адгадвалі загадкі, успаміналі народныя прыкметы. Гаспадыня расказала і пра старадаўнія варажбы на Саракі: як дзяўчаты кідалі птушачак праз плячо, каб даведацца, дзе жыве суджаны, і як манетка ўнутры выпечкі прыносіла шчасце.
Пасля гэтага ўсе ўдзельнічалі ў гульні «Птушка шчасця»: дзеці хадзілі па крузе пад музыку і спрабавалі паспець схапіць птушку, калі музыка спынялася. Той, каму дасталася апошняя, павінен быць самым шчаслівым увесь год.
Калі гульня скончылася, Святлана Іванаўна вярнулася з духоўкі з гарачымі, румянымі, духмянымі птушкамі. Кожны атрымаў менавіта тую, якую сам зрабіў. Завяршылася мерапрыемства агульным выкананнем вяснянкі «Жавароначкі, прыляціце!», дзе дзеці дружна паўтаралі прыпеў «вясна‑красна на ўвесь свет, гу‑у!», як гэта рабілі нашы продкі.
Напрыканцы гаспадыні пажадалі ўсім здароўя, дабрабыту і новых сустрэч. Майстар‑клас атрымаўся не толькі кулінарным, але і сапраўдным падарожжам у беларускія традыцыі, якое пакінула ў дзяцей шмат уражанняў, ведаў і, вядома, смачных успамінаў.
© ДУК «Слуцкі раённы цэнтр народнай творчасці», 2026
Если вы нашли ошибку, выделите ее и нажмите Shift + Enter или нажмите сюда, чтобы сообщить нам.